ការសិក្សារកឃើញថា ស្វានៅប្រាសាទមួយរបស់ឥណ្ឌូនេស៊ីលួចស្មាតហ្វូនពីភ្ញៀវដើម្បីជាថ្នូរនឹងចំណី

ការសិក្សាមួយបានអះអាងថា សត្វស្វាម៉ាកេ ដែលរស់នៅឯប្រាសាទអ៊ូលូវ៉ាទូក្នុងប្រទេសឥណ្ឌូនេស៊ីមានចេតនាលួចយករបស់របរពីភ្ញៀវទេសចរហើយប្រើវាជាថ្នូរដើម្បីទទួលបានអាហារ។ នេះយោងតាមកាសែត Daily Mail សរសេរកាលពីថ្ងៃទី១៥មករា២០២១។

ឥរិយាបថមិនធ្លាប់មានពីមុនមកនេះត្រូវបានអង្កេតដោយអ្នកស្រាវជ្រាវមកពីសាកលវិទ្យាល័យ Lethbridge ក្នុងប្រទេសកាណាដា។

ពួកគេក៏បានកត់សម្គាល់ឃើញដែរថាសត្វស្វាចាស់ៗនិងមានបទពិសោធន៍ច្រើនបានតម្រង់ទិសដៅលួចវត្ថុមានតម្លៃខ្ពស់ដូចជាទូរស័ព្ទហើយត្រូវការអាហារកាន់តែច្រើនសម្រាប់ជាថ្នូរ។

ក្រុមអ្នកស្រាវជ្រាវបានសង្កេតមើលកំណត់ត្រាវីដេអូសត្វស្វានៅពេលភ្ញៀវទេសចរចូលទៅជិតពួកវានៅឯទីសក្ការៈហិណ្ឌូមួយនេះនៅចន្លោះឆ្នាំ ២០១៥ និង ២០១៦ ។

កំណត់ត្រាវីដេអូនេះបានបង្ហាញថាសត្វស្វានឹងកញ្ឆក់យករបស់របរពីមនុស្ស ហើយរង់ចាំមនុស្សផ្តល់អាហារដល់ពួកវាទើបប្រគល់របស់ឱ្យវិញ។

សត្វស្វានឹងប្រគល់របស់របរនោះឱ្យវិញ បន្ទាប់ពីទទួលថ្នូរដែលវាចាត់ទុកថាគ្រប់គ្រាន់និងជាការដោះដូរដោយយុត្តិធម៌។

អ្នកស្រាវជ្រាវនិយាយថា សត្វស្វាចាស់ៗដឹងច្បាស់ថារបស់របរណាមានតម្លៃខ្ពស់បំផុតសម្រាប់មនុស្ស ហើយមានចេតនាកញ្ឆក់យករបស់មានតម្លៃនោះ៕


 

adverise with khmeread