ជនប្រដាប់អាវុធបាញ់សម្លាប់ជនជាតិចិនស្លាប់ម្នាក់និងរបួសម្នាក់នៅក្រុងព្រះសីហនុ

ព្រះសីហនុ ៖ បុរស​ជនជាតិ​ចិន​ម្នាក់ត្រូវបានជនប្រដាប់អាវុធបាញ់សម្លាប់និង​ម្នាក់ទៀតរងរបួស​ធ្ងន់បង្កការភ្ញាក់ផ្អើល នៅចំណុចមុខ​កាស៊ីណូជី​យ​វ​នី​សិន ស្ថិតក្នុង​ក្រុងព្រះសីហនុ ខេត្ត​ព្រះសីហនុ កាលពីថ្ងៃទី​២១ ខែមករា ឆ្នាំ​២០២១។

​ប្រភពព័ត៌មាន​ពី​សមត្ថកិច្ចបានឱ្យដឹងថា ជនរងគ្រោះ​ទាំង​២​នាក់ដែល​គេ​មិនទាន់ស្គាល់ ឈ្មោះនិង​អត្តសញ្ញាណបាន​ជិះ​រថយន្ដម៉ាក Range Rover ពណ៌​ខ្មៅ ពាក់​ស្លាកលេខ ភ្នំពេញ 2AL-9459។ ចំណែក​ជនប្រដាប់អាវុធបាន​ជិះ​រថយន្ដ​ម៉ាក Ford Ranger Rapter ពណ៌​ខ្មៅ ពាក់​ផ្លាកលេខ ភ្នំពេញ 2BI-1413។​

សាក្សី​បានឃើញ​ហេតុការណ៍​បាន​បញ្ជាក់ប្រាប់សមត្ថកិច្ចថា ដំបូង​គេ​ឃើញរថយន្ត​ទាំង​២​គ្រឿង​នេះបាន​ជិះ​ប្រដេញ​គ្នានៅ​ផ្លូវ​បេតុងមុខ​សណ្ឋាគារ៧​ជាន់ រួច​ក៏ឮ​ផ្ទុះអាវុធ​ចំនួន ៣ គ្រាប់ទម្លុះ​កញ្ចក់​រថយន្ត​ជនរងគ្រោះ​តែម្តង។ 

បន្ទាប់មករថយន្ត​ទាំង២​នេះ បាន​បើក​ទៅដល់​មុខ​កាស៊ីណូជី​យ​វ​នី​សិន ក៏ឮ​ផ្ទុះអាវុធ​មួយគ្រា​ប់​ទៀតបណ្តាល​ឱ្យបុរស​ជនជាតិ​ចិន​ម្នាក់​ស្លាប់​ភ្លាមៗ និង​បុរស​ម្នាក់ទៀតជា​អ្នកបើករថយន្ត បាន​រងរបួស​ធ្ងន់រួច​បើក​រត់​មកដល់គ្លីនិក​ឯកជន​មួយកន្លែងនៅ​ក្បែរផ្សារ​ពាណិជ្ជកម្មដើម្បី​ព្យាបាល​របួសបានបង្កការភ្ញាក់ផ្អើលដល់​ប្រជាពលរដ្ឋនិង​សមត្ថកិច្ច​តែម្តង​។​

ក្រោយពី​បានធ្វើ​សកម្មភាព​រួចជនប្រដាប់អាវុធ បាន​យក​រថយន្ដទៅ​ប្លុង​ចោលនៅ​ជិត​ផ្សារ​ដំរី​៥ហើយ​ចុះ​រត់គេចខ្លួន​តែម្ដង​។ចំពោះមូលហេតុនៃការ​បាញ់ប្រហារ ខាងលើ​នេះ សមត្ថកិច្ច កំពុងតែបន្ត​ស្រាវជ្រាវស៊ើបអង្កេត​បន្ត។សមត្ថកិច្ចបានបញ្ជាក់​ទៀតថា ទោះបីជា​យ៉ាងណាសមត្ថកិច្ច​ជំនាញបានកំណត់​រួចជាស្រេចនូវ​មុខសញ្ញាជាជនដៃដល់បាញ់សម្លាប់​ជនជាតិ​ចិន​កំពុង​រត់គេចខ្លួន​រួចជាស្រេច៕


 

adverise with khmeread