យន្តហោះប្រធានាធិបតីម៉ិកស៊ិកទំនើបពេកអត់មានអ្នកហ៊ានទិញ ដាក់លក់៣ឆ្នាំហើយរកម្នាក់ចាប់អារម្មណ៍ក៏គ្មាន!

ការខិតខំ​របស់​ប្រធានាធិបតីម៉ិក​ស៊ិ​កលោក Andrés Manuel López Obrador ដើម្បី​លក់​យន្តហោះ​សម្រាប់ដឹកប្រធានាធិបតី បាន​ឈាន​ចូល​ឆ្នាំ​ទី ៣ ហើយ ​ដោយរកអ្នកទិញមិនទាន់ឃើញ។​

​លោក​ Obrador បានព្យាយាម​ទាក់ទាញ​ក្រុមហ៊ុន​សាជីវកម្ម​និង​នាយកប្រតិបត្តិ​អាជីវ​កម្មធំៗឱ្យ​ទិញ​យន្តហោះ Boeing 787 ​ប៉ុន្តែ​គ្មាន​អ្នក​ចាប់អារម្មណ៍ចង់​ទិញទេ​។​

​ចាប់តាំងពី​លោក Obrador ​ចូលកាន់​តំណែង​នៅ​ថ្ងៃទី​០១ ខែ​ធ្នូ​ឆ្នាំ ២០១៨ លោក​ប្រធានាធិបតី​បាន​ប្តេជ្ញា​លក់​យន្តហោះ​នេះ ព្រោះ​វា​មាន​លក្ខណៈ​ប្រណីត​ពេក​។ ​លោក Obrador មាន​មោទនភាព​ចំពោះ​ការត្បិត​​ត្បៀត​របស់គាត់ ការ​ជិះ​យន្តហោះ​ពាណិជ្ជកម្ម និង ការធ្វើដំណើរ​ទៅ​បរទេស​តែ​ម្តង​គត់​។​

​ប៉ុន្តែ​កាលពី​ថ្ងៃ​ពុធទី​២៤កុម្ភៈលោក​បាន​ទទួល​ស្គាល់​ថា​យន្ដហោះ​នេះ​ពិតជា​ពិបាក​លក់ ពីព្រោះ​វា​ត្រូវការ​ជំនាញ​បច្ចេកទេសខ្ពស់​ពេក​និង​ផលិត​តាមរយៈ​ការ​កុម្ម៉ង់​។​

​យន្តហោះ​នេះ​ត្រូវបាន​ទិញ​ក្នុងតម្លៃ ២០០ លាន​ដុល្លារ​ហើយ​ត្រូវបាន​ប្រើ​ដោយ​ប្រធានាធិបតី​មុន​គឺ​លោក Enrique Peña Nieto​។ វា​ពិបាក​ក្នុង​ការលក់​ព្រោះ​វា​ត្រូវ​បាន​គេ​កំណត់​អាច​ផ្ទុក​បានតែ ៨០ នាក់​ប៉ុណ្ណោះ​និង​មាន​ឈុត​គេង​សម្រាប់​ប្រធានាធិបតី​ពេញលេញ​ជាមួយនឹង​អាង​ងូតទឹក​ឯកជន​។ ក្រុម​អ្នកជំនាញ​និយាយថា​​នឹង​ចំណាយ​ខ្ពស់​ណាស់​ក្នុង​ការកែ​ទៅ​ជា​យន្តហោះ​ដឹក​អ្នកដំណើរ​ធម្មតា ដែល​អាច​ដឹកមនុស្ស​រហូត​ដល់ ៣០០ នាក់​៕ ប្រភព ៖ Daily Mail

-->
adverise with khmeread