អាវុធហត្ថរាជធានីបញ្ជូនជនសង្ស័យម្នាក់ទៅតុលាការ ពាក់ព័ន្ធករណីប៉ុនប៉ងរំលោភសេពសន្ថវៈ

ភ្នំពេញ ៖ សមត្ថកិច្ចជំនាញការិយាល័យប្រឆាំងការជួញដូរមនុស្ស នៃកងរាជអាវុធហត្ថរាជធានីភ្នំពេញ បានបញ្ជូនជនសង្ស័យម្នាក់ទៅតុលាការ ពាក់ព័ន្ធករណីប៉ុនប៉ងរំលោភសេពសន្ថវៈ កាលពីថ្ងៃទី២៦ ខែកុម្ភៈ ឆ្នាំ២០២១។

មន្ត្រីអាវុធហត្ថបានឱ្យដឹងថា ជនសង្ស័យឈ្មោះ មឿន  រស្មី ភេទប្រុស អាយុ១៨ឆ្នាំ មុខរបរកម្មករសំណង់ មានស្រុកកំណើត នៅភូមិត្រពាំងឈូក ឃុំរំចេក ស្រុកព្រះស្តេច ខេត្តព្រៃវែង។ បច្ចុប្បន្នស្នាក់នៅរោងកម្មករក្នុងបុរីមួយកន្លែង ក្នុងភូមិក្តីតាកុយ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ។ ការឃាត់ខ្លួនជនសង្ស័យនាពេលនេះធ្វើឡើងតបតាមបណ្តឹរបស់នារីរងគ្រោះ ដោយប្តឹងពីបទ «ប៉ុនប៉ងរំលោភសេពសន្ថវៈ»។

តាមចម្លើយសារភាពរបស់ជនសង្ស័យបានឱ្យដឹងថា «កាលពីវេលាម៉ោង០៣ទៀបភ្លឺ ថ្ងៃទ២៤ ខែកុម្ភៈ ឆ្នាំ២០២១ ដោយខ្លួនគេងពុំលក់ ខ្លួនក៏ងើបដើរសំដៅទៅបន្ទប់របស់នារីរងគ្រោះដែលជាកម្មករសំណង់ជាមួយគ្នា។ ពេលដើរទៅដល់មុខបន្ទប់របស់នាងឃើញបន្ទប់បានបិទជិត ខ្លួនក៏ចូលទៅហែកទ្វារដើម្បីលូនចូលទៅក្នុងបន្ទប់របស់នារីរងគ្រោះ ហើយក៏ ឃើញនាងកំពុងគេងម្នាក់ឯង» ។

ជនសង្ស័យបន្តថា ឆ្លៀតឱកាសល្អខ្លួនបានស្ទុះទៅឱបនាងពីលើ ស្រាប់តែនាងដឹងខ្លួនបានចាប់កអាវខ្លួនជាប់ និងស្រែកឱ្យគេជួយ ហើយក៏មានបុរសម្នាក់ជាមេជាងដែលគេងនៅបន្ទប់ក្បែរនោះរត់មកជួយចាប់រូបខ្លួនប្រគល់ឱ្យសមត្ថកិច្ចអាវុធហត្ថខណ្ឌច្បារអំពៅតែម្តងទៅ។ ហើយជនសង្ស័យខាងលើនេះធ្លាប់បានប្រើប្រាស់គ្រឿងញៀនអស់រយៈពេលជាងមួយឆ្នាំមកហើយ៕

-->
adverise with khmeread