ក្លឹប Manchester City បញ្ជាក់ថា Sergio Aguero នឹងចាកចេញនៅដំណាច់ រដូវកាលនេះ

        ខ្សែប្រយុទ្ធ Sergio Aguero នឹងចាកចេញពីក្លឹប Manchester City នៅដំណាច់រដូវកាលនេះ បន្ទាប់ពីចំណាយពេលមួយទសវត្សរ៍ជាមួយក្លឹបនេះ។

        ខ្សែប្រយុទ្ធដ៏ឆ្នើមរបស់ក្រុម City រកបាន ២៥៧ គ្រាប់នៅគ្រប់ក្របខណ្ឌប្រកួតចាប់តាំងផ្ទេរពីក្លឹប Atletico Madrid ក្នុងតម្លៃ៣៥លានផោន ហើយគ្រោងនឹងលើកពានជើងឯកក្របខណ្ឌPremier League លើកទី៥នៅឆ្នាំនេះ។

         Sergio Aguero អាយុ៣២ឆ្នាំបានធ្វើការចរចាជាមួយលោក Pep Guardiola និងថ្នាក់ដឹកនាំផ្សេងទៀតរបស់ក្លឹបកាលពីរសៀលថ្ងៃច័ន្ទ។ ក្លឹប City បានប្រកាសនៅ ពេលក្រោយមកទៀតថា កីឡាកររូបនេះនឹងចាកចេញពីពហុកីឡាដ្ឋាន Etihad Stadium នៅពេលណាចប់កិច្ចសន្យានៅរដូវក្តៅនេះ។

        កីឡាករអាហ្សង់ទីនរូបនេះគឺជាវីរបុរសរបស់ក្លឹប បន្ទាប់ពីកីឡាកររូបនេះរកបានគ្រាប់បាល់ចុងម៉ោងជួយឲ្យក្រុមCity លើកពានជើងឯកលើកដំបូងចាប់តាំងពីឆ្នាំ ១៩៦៨ ហើយការរកបានគ្រាប់បាល់នេះគឺនៅក្នុងការបង្ហាញមុខនៅរដូវកាលដំបូងនៅអង់គ្លេស។

         Sergio Aguero រកបាន១៨១គ្រាប់ក្នុងលីក និងជាកីឡាករបរទេសដែលរកបានគ្រាប់បាល់ច្រើនជាងគេនៅក្របខណ្ឌបាល់ទាត់អង់គ្លេស។ លោក Khaldoon Al Mubarak ជានាយក្លឹបCityបានបង្ហើបប្រាប់ថា Aguero នឹងមានកេរ្តិ៍ឈ្មោះជាអមតៈនៅពហុកីឡាដ្ឋានEtihad Stadium បន្ទាប់ពីក្លឹបផ្តល់ជារូបសំណាក ដើម្បីកត់សម្គាល់ពីជោគជ័យរបស់កីឡាកររូបនេះ៕

-->
adverise with khmeread