នៅថ្ងៃមង្គលការកូន ម្តាយសឹងទន់ជង្គង់ដួល ពេលដឹងថាកូនក្រមុំរបស់កូនប្រុសគាត់ជាកូនស្រីដែលបាត់ខ្លួនជាយូរមកហើយ

ស្ដ្រីម្នាក់បានរកឃើញថា កូនស្រីដែលបាត់ជាយូរមកហើយរបស់គាត់ គឺជាកូនក្រមុំរបស់កូនប្រុសគាត់នៅថ្ងៃមង្គលការពួកគេក្នុងប្រទេសចិន។

ស្ត្រីរូបនេះត្រូវបានគេរាយការណ៍ថាអាចចំណាំកូនស្រីគាត់ ដែលគេបំបែកជាច្រើនឆ្នាំមកហើយដោយស្នាមដៅនៅលើដៃរបស់នាងនៅថ្ងៃនៃពិធីមង្គលការនេះ។

កូនក្រមុំនិងម្តាយរបស់នាងឃើញយំឱបគ្នាទៅវិញទៅមកក្នុងអំឡុងពេលជួបជុំគ្នាដ៏ភ្ញាក់ផ្អើលនៅទីក្រុង Suzhou ខេត្ត Jiangsu កាលពីថ្ងៃទី ៣១ ខែមីនា។

ពិធីមង្គលការអាចបន្តទៅមុខបានបន្ទាប់ពីមានការបញ្ជាក់ថាកូនប្រុសរបស់ស្ត្រីនោះត្រូវបានយកទៅចិញ្ចឹម ចឹងមានន័យថាពួកគេមិនជាប់សាច់ឈាមគ្នាទេ។

តាមសេចក្តីរាយការណ៍បានឱ្យដឹងថាស្ត្រីរូបនេះបានសម្រេចចិត្តយកកូនប្រុសម្នាក់មកចិញ្ចឹម បន្ទាប់ពីបានស្វែងរកកូនស្រីអស់រយៈពេលជាច្រើនឆ្នាំមិនឃើញ។

យោងតាមសារព័ត៌មាន Times Now បានឱ្យដឹងថាម្តាយរបស់កូនកំលោះបានកត់សម្គាល់ស្នាមដៅនៅលើដៃកូនក្រមុំ។

ឃើញដូច្នេះលោកស្រីបានបង្ខំចិត្តសួរឪពុកម្តាយខាងកូនក្រមុំថាតើកូនស្រីរបស់ពួកគេត្រូវបានយកមកចិញ្ចឹមឬយ៉ាងណា។

ឪពុកម្តាយរបស់កូនក្រមុំមានការរំជើបរំជួលដោយសំណួរនោះ មុនពេលនិយាយថាពួកគេបានយកកូននោះមកចិញ្ចឹមបន្ទាប់ពីរកឃើញនាងនៅតាមដងផ្លូវកាលពីជាង ២០ ឆ្នាំមុន។

ក្រោយពីស្ដាប់រឿងរ៉ាវនេះរួចកូនក្រមុំបានស្រក់ទឹកភ្នែក ហើយបានរៀបរាប់ពីគ្រាដែលបានជួបម្តាយបង្កើតរបស់នាងថា "រីករាយជាងថ្ងៃរៀបការ" ទៅទៀត។

ពិធីមង្គលការអាចឈានទៅមុខបន្ត ទោះបីជាមានឈុតឆាកភ្ញាក់ផ្អើលនេះក្តី ហើយគូស្នេហ៍ទាំងពីរបានសច្ចាទល់មុខគ្នា៕

-->
adverise with khmeread

អ្នកនឹងចូលចិត្ត