ភ្នំពេញ ៖ ជនសង្ស័យម្នាក់ត្រូវបានប៉ូលិសខណ្ឌសែនសុខឃាត់ខ្លួនកាលពីម៉ោង១១ថ្ងៃទី១៨ខែធ្នូ ឆ្នាំ ២០១៥ នៅចំណុចផ្លូវ១០០៣ភូមិទំនប់ សង្កាត់ភ្នំពេញថ្មីខណ្ឌសែនសុខកាំភ្លើងខ្លីប្រើខ្យល់១ដើមនិងថ្នាំញៀនចំនួន២កញ្ចប់។
ប៉ូលិសនិយាយថា ជនសង្ស័យឈ្មោះ ឡុង វុទ្ធី ភេទប្រុសអាយុ២៩ឆ្នាំមុខរបរជាងដេគ័រស្នាក់នៅភូមិទួលសង្កែ សង្កាត់ទួលសង្កែ ខណ្ឌឫស្សីកែវនិងមានស្រុកកំណើតភូមិស្តុក ឃុំស្តុក ស្រុកអង្គរជ័យ ខេត្តតាកែវ។
ប៉ូលិសបន្តថា មុនពេលឃាត់ខ្លួនជនសង្ស័យខាងលើនេះកម្លាំងអន្តរាគមន៍ខណ្ឌសែនសុខកំពុងធ្វើល្បាតនៅចំណុចខាងលើហើយក៏ឃើញជនសង្ស័យកំពុងជិះម៉ូតូមួយគ្រឿងម៉ាកហុងដាពណ៌សពាក់ស្លាកលេខភ្នំពេញ1CL-7677។
ពេលឃើញសមត្ថកិច្ចស្រាប់តែជនសង្ស័យបានបើកម៉ូតូរត់ពេលនោះប៉ូលិសដេញតាមចាប់ខ្លួនបានរួចធ្វើការឆែកឆេរនៅក្នុងកាបូបស្ពាយរកឃើញថ្នាំញៀនចំនួន២កញ្ចប់តូច១ធំ១និងកាំភ្លើងបាញ់គ្រាប់កង់ប្រើខ្យល់១ដើមនិងឧបករណ៍ល្មើសមួយចំនួនធំក៏ឃាត់ខ្លួនតែម្តង៕
-->
