adverise with khmeread E3f95672 2c80 4d93 b922 7e2684a3af5d

ឃាត់ខ្លួន​ក្រុម​ជួញដូរ​នឹង​ប្រើប្រាស់​ថ្នាំញៀន​៥​នាក់ ដកហូត​ថ្នាំញៀន​៧២​គ្រាប់​

    បន្ទាយមានជ័យ ៖ ជនសង្ស័យ​ជួញដូរ​និង​ប្រើប្រាស់​គ្រឿងញៀន​បាន​ចំនួន​៥​នាក់ ក្នុងនោះ​អ្នកជួញដូរ​ម្នាក់ អ្នកប្រើប្រាស់​៤​នាក់ ត្រូវបាន​សមត្ថកិច្ច​ឃាត់ខ្លួន​នៅ​ចំណុច​ភូមិ​ចំបក់ ឃុំ​បឹងបេង ស្រុក​ម៉ាឡៃ ខេត្តបន្ទាយមានជ័យ កាលពី​ព្រឹក​ថ្ងៃទី​១៨ ​ខែឧសភា​ ឆ្នាំ​២០១៦។​

    ប៉ូលិស​និយាយថា កម្លាំង​ប៉ូលិស​ការិយាល័យ​ប្រឆាំង​គ្រឿងញៀន​សហការ​ជាមួយ​កម្លាំង​ប៉ូលិស​ការិយាល័យ ប្រឆាំង​ការជួញដូរ​មនុស្ស​និង​ការពារ​អនីតិជន កម្លាំង​ប៉ូលិស​វរ​សេនា​តូច​ការពារ​ព្រំដែន​គោក​លេខ​៨១៥ និង​កម្លាំង​ប៉ូលិស​ស្រុក​ម៉ាឡៃ បាន​ចុះបង្ក្រាប​ករណី​ជួញដូរ​និង​ប្រើប្រាស់​គ្រឿងញៀន​ចាប់​ឃាត់ខ្លួន​ជនសង្ស័យ​ជួញដូរ​និង​ប្រើប្រាស់​គ្រឿងញៀន​បាន​ចំនួន​៥​នាក់ ក្នុងនោះ​អ្នកជួញដូរ​ម្នាក់ អ្នកប្រើប្រាស់​៤​នាក់ នៅ​ចំណុច​ភូមិ​ចំបក់ ឃុំ​បឹងបេង ស្រុក​ម៉ាឡៃ រួច​បញ្ជូន​មកកាន់​ស្នងការដ្ឋាន​នគរបាល​ខេត្ត​កាលពី​ព្រឹក​ថ្ងៃទី​១៨ ​ខែឧសភា​ ឆ្នាំ​២០១៦។​

    ប៉ូលិស​បន្តថា ជនសង្ស័យ​ឈ្មោះ ​ឈឿង សារុន ​ហៅ​តៅ ភេទ​ប្រុស​ អាយុ​៤៤​ឆ្នាំ នៅ​ភូមិ​ចំបក់ ឃុំ​បឹងបេង ស្រុក​ម៉ាឡៃ ខេត្តបន្ទាយមានជ័យ ជា​មុខសញ្ញា​ជួញដូរ​និង​ដកហូត​បាន​វត្ថុតាង​ថ្នាំញៀន​ប្រភេទ​មេ​តំ​ហ្វេ​តា​មីន​គ្រាប់ ពណ៌​ក្រហម ចំនួន​៧២ គ្រាប់ ប្រដាប់​កាច់​សោរ​ម៉ូតូ​មាន​អក្សរ​T​ចំនួន​២ ផ្លែ​សម្រាប់​កាច់​សោ​.​ក ១,​ឧបករណ៍​ជក់​មួយចំនួន​និង​បំពង់​ប៊ឺ​ត​កាត់​ជា​កំណាត់ៗ​១​ថង់ ,​ដែកកេះ​១ និង​ទូរស័ព្ទដៃ​ចំនួន​៤​គ្រឿង។​

    តាម​ចម្លើយសារភាពរ​បស់ជនស​ង្ស័​យ​សមត្ថកិច្ច​បង្ក្រាប​បាន​មុខសញ្ញា​ប្រើប្រាស់​គ្រឿងញៀន​ចំនួន​៤​នាក់​ផ្សេងទៀត​ដែលមាន​ឈ្មោះ ១-​ភា​ជ សេរី ភេទ​ប្រុស​ អាយុ​៣៣​ឆ្នាំ នៅ​ភូមិ​ថ្មី ឃុំ​ម៉ាឡៃ ស្រុក​ម៉ាឡៃ ខេត្តបន្ទាយមានជ័យ​,២-​សុខ ចាន់​ដឿ​ន ភេទ​ប្រុស ​អាយុ​២៨​ឆ្នាំ នៅ​ភូមិ​អូ​ច្រា ក្រុងប៉ៃលិន​,៣- អឿន ភី​នឿន ភេទ​ប្រុស ​អាយុ​២៥​ឆ្នាំ នៅ​ភូមិ​ភ្នំ​រូង ឃុំ​បឹងបេង ស្រុក​ម៉ាឡៃ ខេត្តបន្ទាយមានជ័យ​ និង​៤-​ឈ្មោះ ភិន ផាន់​ណូ ភេទ​ប្រុស​អាយុ​២៦​ឆ្នាំ នៅ​ភូមិ​សង្កែ ឃុំ​បឹងបេង ស្រុក​ម៉ាឡៃ ខេត្តបន្ទាយមានជ័យ​។​

    នៅ​ចំពោះមុខ​សមត្ថកិច្ច​ជនសង្ស័យ​ឈ្មោះ ​ឈឿន សារុន ហៅ​តៅ បាន​សារភាពថា រូបគេ​ពិតជា​បាន​ទិញ​ថ្នាំញៀន​ទាំងនេះ​យកមក​លក់​ចែកចាយ​បន្ត ក្នុង​១​គ្រាប់​តម្លៃ​១០០​បាត ប្រាក់​ថៃ នោះ​ពិតប្រាកដ​មែន ចំណែក​អ្នកប្រើប្រាស់​ទាំង​៤​នាក់​ពួកគេ​ក៏បាន​សារភាព ថា​ពិតជា​បាន ប្រើប្រាស់​អស់​រយៈពេល​ជាច្រើន​ខែ​មក​ផងដែរ​។​

    ដោយ​ផ្អែកលើ​ចម្លើយសារភាព​និង​ដកហូត​បាន​វត្ថុតាង​ជាក់ស្តែង បច្ចុប្បន្ន​ជនសង្ស័យ​ទាំង​អ្នកជួញដូរ​និង​ប្រើប្រាស់ ត្រូវបាន​កម្លាំង​នគរបាល​ជំនាញ​ការិយាល័យ ប្រឆាំង​គ្រឿង​ញៀន កំពុង​រៀបចំ​សំណុំរឿង​បញ្ជូនទៅ​សាលាដំបូង ដើម្បី​ចាត់ការ​តាមផ្លូវ​ច្បាប់​៕

adverise with khmeread

អ្នកនឹងចូលចិត្ត

មតិយោបល់