adverise with khmeread 1

ដំណឹង​អាក្រក់​សម្រាប់​ពិភពលោក​! អាមេរិក​រកឃើញ​ករ​ណី​ទីមួយ​នៃ​កំពូល​បាក់តេរី​ស៊ាំ​ថ្នាំ​ផ្សះ​គ្រប់​ប្រភេទ ដែល​អាច​ប្រល័យ​ជីវិត​ឥត​អាសូរ​

    ​ក្រុមមន្ត្រី​សុខាភិបាល​អាមេរិក​កាលពី​ថ្ងៃ​ព្រហស្បតិ៍​ទី ២៦ ខែឧសភា​បាន​រាយការណ៍​អំពី​ករណី​ទីមួយ​នៃ​អ្នកជំងឺ​ម្នាក់​ដែលមាន​មេរោគ​ស៊ាំ​នឹង​ថ្នាំ​ផ្សះ​គ្រប់​ប្រភេទ (Antibiotics) ក្នុងប្រទេស​របស់ខ្លួន និង​បាន​សម្តែង​ក្តីបារម្ភ​យ៉ាងខ្លាំង​ថា កំពូល​បាក់តេរី​អាច​នឹង​បង្ក​គ្រោះថ្នាក់​ខ្លាំង ប្រសិនបើ​វា​រាតត្បាត​។ 

​    ​ដោយ​សំដៅលើ​ស្ត្រី​អ្នកជំងឺ​អាយុ ៤៩ ឆ្នាំ​មកពី​រដ្ឋ​ផេ​ន​ស៊ី​ល​វ៉ា​នៀ ដែល​មិនបាន​ធ្វើដំណើរ​រយៈពេល ៥ ខែ លោក Thomas Frieden នាយក​មជ្ឈមណ្ឌល​អាមេរិក​សម្រាប់​គ្រប់គ្រង​និង​បង្ការ​ជំងឺ បាន​និយាយថា "​យើង​កំពុង​ប្រឈម​ហានិភ័យ​ក្នុងការ​ធ្លាក់​ទៅក្នុង​ពិភពលោក​ក្រោយ​សម័យ​អត់​ថ្នាំ​ផ្សះ​ហើយ​"​។​

​    ​ថ្លែង​ទៅកាន់​ពិធី​ទទួលទាន​អាហារ​ថ្ងៃត្រង់​របស់​ក្លឹប​អ្នកកាសែត​ជាតិ​ក្នុង​ទីក្រុង​វ៉ាស៊ីនតោន លោក Frieden បាន​និយាយថា ជំងឺ​របស់​ស្ត្រី​ម្នាក់​នោះ​មិនអាច​គ្រប់គ្រង​បានទេ​សូម្បី​ប្រើ​ថ្នាំ​ផ្សះ Colistin ជា​ថ្នាំ​ផ្សះ​ខ្លាំងជាងគេ​សម្រាប់​ទុក​ប្រើ​ប្រឆាំងនឹង "​បាក់តេរី​គួរឱ្យខ្លាច​ជាងគេ​"​។ 

​    ​មេរោគ​ឆ្លង​នេះ​ត្រូវបាន​គេ​និយាយថា​ឆ្លង​ចូល DNA តូច​មួយ​ហៅថា ប្លា​ស្មី​ត (plasmid) ដែល​ឆ្លងកាត់​តាមរយៈ​ហ្សែ​ន​មួយ​ហៅថា mcr-1 ដែល​ធ្វើឱ្យ​ស៊ាំ​នឹង​ថ្នាំ​ផ្សះ Colistin​។  

​    ​លោកស្រី​វេជ្ជបណ្ឌិត Gail Cassell អ្នកឯកទេស​ផ្នែក​មីក្រុប និង​ជា​សាស្ត្រាចារ្យ​ជាន់ខ្ពស់​នៅ​សាលា​វេជ្ជសាស្ត្រ​ហា​វើត (Harvard Medical School) បាន​និយាយថា "​វា​មាន​គ្រោះថ្នាក់​ណាស់​។ យើង​អាច​សន្និដ្ឋានថា​វា​នឹង​រីក​រាលដាល​យ៉ាង​ឆាប់រហ័ស សូម្បី​នៅក្នុង​បរិវេណ​មន្ទីរពេទ្យ​ក៏ដោយ ប្រសិនបើ​វា​មិនអាច​ទប់ស្កាត់​បានល្អ​នោះ​"​។ 

​    ​ប៉ុន្តែ​លោកស្រី​បាន​និយាយថា សក្តានុពល​នៃ​ល្បឿន​រាលដាល​របស់​មេរោគ​ក្នុង​ខ្លួន​អ្នកជំងឺ​នេះ​នៅ​មិនទាន់​ដឹង​ទេ​ដរាបណា​គេ​សិក្សា​បន្ថែម​ពី​របៀប​ដែល​ស្ត្រី​នៅ​រដ្ឋ​ផេ​ន​ស៊ី​ល​វ៉ា​នៀ​នេះ​ឆ្លង​មេរោគ និង​ត្រូវ​ដឹងថា​តើ​កំពូល​បាក់តេរី​ស៊ាំ​ថ្នាំ​ផ្សះ Colistin មាន​វត្ត​មាននៅ​អាមេរិក និង​សកលលោក​យ៉ាងដូចម្តេច​"​។​

​    ​ក្នុង​សហរដ្ឋអាមេរិក ការ​ស៊ាំ​ថ្នាំ​ផ្សះ​ត្រូវបាន​ស្តីបន្ទោស​ចំពោះ​ការឆ្លង​ជំងឺ​ចំនួន​យ៉ាងតិច ២ លាន​ករណី និង​ការស្លាប់​ចំនួន ២៣.០០០ នាក់​រៀងរាល់ឆ្នាំ​៕

​ប្រភព​៖ រ៉​យ​ទ័​រ

adverise with khmeread

អ្នកនឹងចូលចិត្ត

មតិយោបល់