adverise with khmeread 9acceb81 3c31 40ee 9856 6710e23aeee7

មេឃ​ភ្លៀង ចូល​ជ្រក​ក្រោម​ដើមឈើ រន្ទះបាញ់​ស្លាប់​ទាំង​ឪពុក និង​កូន

    បន្ទាយមានជ័យ ៖ ឪពុក និង​កូនប្រសារ​បាន​ទៅ​ភ្ជួរស្រែ​ស្រាប់​តែមាន​ភ្លៀងរលឹម ក៏​នាំគ្នា​ចូល​ជ្រក​ក្រោម​ដើមឈើ និង​ដូរ​កង់​គោយន្ត ដើម្បី​ត្រឡប់មកផ្ទះ ត្រូវ​រន្ទះបាញ់​បណ្ដាល​ឲ្យ​ស្លាប់​ទាំង​ ២ ​នាក់​។​

    គ្រោះថ្នាក់​ធម្មជាតិ​នេះ កើតឡើង​កាលពី​វេលា​ម៉ោង​១៥​ និង​៤៥​នាទី​រសៀល​ថ្ងៃទី​៣១ ខែឧសភា ឆ្នាំ​២០១៦ ​នៅ​ចំណុច​វាល​គោក​ទិល​ខាងលិច​ភូមិ ចម្ងាយ​ប្រមាណ ២km ក្នុងភូមិ​ថ្មី​ខាងលិច ឃុំ​ភូមិ​ថ្មី ស្រុក​ថ្មពួក ខេត្តបន្ទាយមានជ័យ​។​

    លោក  អ៊ុក សុផាត អធិការ​ប៉ូលិស​ស្រុក​ថ្មពួក បាន​ឲ្យ​ដឹងថា ជនរងគ្រោះ​ទី​១.​ឈ្មោះ យង់ យ៉ា ភេទ​ប្រុស អាយុ​៥០​ឆ្នាំ និង​ទី​២.​ឈ្មោះ គឿ ផល ភេទ​ប្រុស អាយុ​៣០​ឆ្នាំ ត្រូវជា​កូនប្រសា រស់នៅ​ភូមិ​ថ្មី​ខាងលិច ឃុំ​ភូមិ​ថ្មី ស្រុក​ថ្មពួក បាន​ទៅ​ភ្ជួរស្រែ​នៅ​ចំណុច​វាល​គោក​ទិល ខាងលិច​ភូមិ​ចម្ងាយ​ប្រមាណ​ ២km។​

    ពេល​ភ្លៀងរលឹម​បាន​បណ្ដើរ​គោយន្ត​ទៅ​ឈប់​ក្បែរ​ដើម​ចំបក់ នាំគ្នា​ដោះ​ប្ដូរ​កង់​ដែក ដាក់​កង់​កៅស៊ូ ដើម្បី​បើក​ត្រឡប់មកផ្ទះ​វិញ ស្រាប់​តែមាន​រន្ទះបាញ់​ចំ​ដើម​ចំបក់ ដែល​ជនរងគ្រោះ​នៅ​ពីក្រោម បណ្ដាល​ឲ្យ​ស្លាប់​ទាំង​ ២​ នាក់​តែម្តង​។​

    ក្រោយ កើតហេតុ សមត្ថកិច្ច បាន​ចុះទៅ​ត្រួតពិនិត្យ​ឃើញថា ជនរងគ្រោះ​ពិតជា​ស្លាប់​ដោយសារតែ​រន្ទះបាញ់​ពិតមែន ហើយ​បានប្រគល់​សព​ឲ្យ​ក្រុមគ្រួសារ​យកទៅ​ធ្វើបុណ្យ​តាម​ប្រពៃណី​៕​

adverise with khmeread

អ្នកនឹងចូលចិត្ត

មតិយោបល់