adverise with khmeread Index1

យុវតីជាប្អូនបានស្លាប់នៅមន្ទីរពេទ្យជោរីភ្នំពេញ

    ព្រះសីហនុ ៖ យុវតី​សិស្ស​ពូកែ​កុយ អេង​លីន ត្រូវជា​ប្អូន ដែល​រថយន្ត​អេ​ស្កា​ឡែ​តរបស់​ថៅកែ​ភោជនីយដ្ឋាន​ឆ្នេរ​មាស​បើក​បុក​នៅ​ខេត្ត​ព្រះសីហនុ កាលពី​ថ្ងៃទី​២២ ខែធ្នូ នោះ បាន​ស្លាប់​នៅ​ម៉ោង​ប្រមាណ ១១​យប់​ថ្ងៃទី​២៤ ខែធ្នូ ឆ្នាំ​២០១៥ នេះ នៅ​មន្ទីរពេទ្យ​ជោ​រី​ភ្នំពេញ បន្ទាប់​យុវតី​ជា​បង​បាន​ស្លាប់​ភ្លាមៗ​នៅ​កន្លែងកើតហេតុ​។​
    ក្រុមគ្រួសារ​យុវតី​កុយ អេង​លីន បាន​ឲ្យ​ដឹងថា នាង​បាន​ស្លាប់​បន្ទាប់ពី​ព្យាយាម​សង្គ្រោះ​មិនបាន​សម្រេច ហើយ​ក្រុមគ្រួសារ​បានរៀបចំ​បែបបទ​នាំ​សព​ទៅកាន់​ខេត្ត​ព្រះសីហនុ​ធ្វើបុណ្យ​តាម​ប្រពៃណី​។​
    គួររំលឹកថា កាលពី​ម៉ោង​៩​និង​១៥​នាទី​ព្រឹក​ថ្ងៃទី​២២ ខែធ្នូ ឆ្នាំ​២០១៥ យុវ​សិស្ស ២​នាក់​បងប្អូន ពេល​ជិះ​ម៉ូតូឌុប​គ្នា​មកពី​ដង្ហែ​សព​មិត្តភក្តិ ត្រូវបាន​រថយន្ត​អេ​ស្កា​ឡែ​តរបស់​ថៅកែ​ភោជនីយ៍ដ្ឋាន​ឆ្នេរ​មាស​ក្រុងព្រះសីហនុ បុក​ពេញទំហឹង​បណ្តាល​ឲ្យ​ស្លាប់​ម្នាក់​ភ្លាមៗ នៅ​កន្លែងកើតហេតុ រីឯ​ម្នាក់ទៀត​របួសធ្ងន់ ត្រូវបាន​បញ្ជូនមក​ស​ង្គ្រោះ​នៅ​មន្ទីរពេទ្យ​នៅ​ភ្នំពេញ តែ​នាង​ត្រូវស្លាប់​នៅ​ម៉ោង​ជិត​១១​យប់​ថ្ងៃទី​២៤ ខែធ្នូ នេះ​។​
   ប៉ូលិស​និយាយថា នៅ​ម៉ោង​កើតហេតុ​កាលពី​ថ្ងៃទី​២២ ខែធ្នូ នៅតាម​ដងផ្លូវ​ជាតិ​លេខ​៤ ចន្លោះ​គីឡូម៉ែត្រ​លេខ​២១២ -២១៣ ស្ថិតក្នុង​ភូមិ​ពូ​ធឿ​ង ឃុំ​បិត​ត្រាំ​ង ស្រុក​ព្រៃនប់ ខេត្ត​ព្រះសីហនុ គេ​ឃើញ​រថយន្ត ១​គ្រឿង​ម៉ាក​អេ​ស្កា​លែ​ត ពណ៌​ខ្មៅ ពាក់​ស្លាក​លេខ​ភ្នំពេញ 2U-6969 ទិសដៅ​ពី​ភ្នំពេញ មក​ខេត្ត​ព្រះសីហនុ ក្នុង​ល្បឿន​យ៉ាង​លឿន បាន​បើក​បុក​យុវតី​ពីរ​នាក់​បងប្អូន​កំពុង ជិះ​ម៉ូតូ​ស្កុប​ពី​ឌុប​គ្នា​។​
   យុវតី​ជា​បង​ឈ្មោះ កុយ អេង​លី អាយុ ១៧​ឆ្នាំ រីឯ​ប្អូន​ឈ្មោះ កុយ អេង​លីន ពួកគេ​ទាំងពីរ​នាក់​ជា​សិស្ស​ថ្នាក់​ទី​១០ សាលា​អន្តរទ្វីប ពួកគេ​ជា​សិស្ស​ពូកែ​ប្រចាំ​សាលា​៕​

adverise with khmeread

មតិយោបល់