Index

លោកជែក ម៉ា៖ ធ្វើការឲ្យក្រុមហ៊ុនតូចល្អជាងក្រុមហ៊ុនធំ

មហាសេដ្ឋី​ក្រុមហ៊ុន Alibaba លោក ជែក ម៉ា (Jack Ma) មាន​ភាពល្បីល្បាញ​ខាង​ការចែករំលែក​គតិបណ្ឌិត​ដ៏​មានតម្លៃ​របស់លោក​ក្នុងឱកាស​អញ្ជើញ​តាម​កម្មវិធី​ទូរទស្សន៍​លើ​ពិភពលោក​ម្តងៗ​។ លើក​នេះ​ក្នុង​កម្មវិធី​មួយ​លើ​ប៉ុស្តិ៍​ទូរទស្សន៍​កូរ៉េ KBS1 លោក​បាន​បង្ហើប​នៅមុខ​ទស្សនិកជន​វ័យក្មេង​ឲ្យ​ដឹង​ពី​ការ​ក្រេប​យក​បទពិសោធន៍​អាជីវកម្ម និង​ប្រាប់​ពី​តម្រុយ​ថា​គួរ​ជ្រើសរើស​ប្រភេទ​ក្រុមហ៊ុន​ណា​សម្រាប់​មនុស្ស​វ័យក្មេង​ដែល​សង្វាត​ចង់​ធ្វើការ​នៅ​ក្រុមហ៊ុន​ធំ​។​

​ខាងក្រោម​នេះ​គឺជា​ការដកស្រង់​ចេញពី​បទសម្ភាសន៍​រប​ស់លោក​៖

"​មុន​អាយុ ២០ ឆ្នាំ ត្រូវ​រៀន​ឲ្យ​ពូកែ​។ ប្រសិនបើ​អាច ត្រូវមាន​បទពិសោធន៍​ការងារ​ខ្លះ​។ មុន​អាយុ ៣០ ធ្វើតាម​គំរូ​មនុស្ស​ណា​ម្នាក់​។ ចូរ​ធ្វើការ​ឲ្យ​ក្រុមហ៊ុន​តូច​។ ជាធម្មតា នៅ​ក្រុមហ៊ុន​ធំ​ល្អ​សម្រាប់​រៀន​អំពី​ដំណើរការ​។ អ្នក​គឺជា​ផ្នែក​នៃ​ម៉ាស៊ីន​ដ៏​ធំ​មួយ​។ ប៉ុន្តែ​នៅពេល​អ្នកធ្វើការ​នៅ​ក្រុមហ៊ុន​តូច អ្នកនឹង​រៀន​ពី​មហិច្ឆតា​។ អ្នករៀន​អំពី​ក្តី​សុបិន​។ អ្នករៀន​អំពី​របៀប​ធ្វើ​រឿង​ជាច្រើន​ក្នុងពេល​តែមួយ​"​។

"​ពី​អាយុ ៣០ ដល់ ៤០ អ្នក​ត្រូវតែ​ចេះ​គិតគូរ​ឲ្យ​ច្បាស់លាស់​។ ត្រូវធ្វើ​ការ​ឲ្យ​ខ្លួនឯង ប្រសិនបើ​អ្នក​ចង់​ក្លាយជា​សហគ្រិន​។ នៅពេល​អ្នកមាន​អាយុ ៥០ ទៅ ៦០ រៀនធ្វើការ​ពី​មនុស្ស​វ័យក្មេង​វិញ ព្រោះ​មនុស្ស​វ័យក្មេង​អាច​ធ្វើបាន​ប្រសើរ​ជាង​អ្នក​។ ដូច្នេះ​ត្រូវ​ពឹង​ផ្អែកលើ​ពួកគេ វិនិយោគ​លើ​ពួកគេ ហើយ​ត្រូវ​ប្រាកដថា​ពួកគេ​ជា​មនុស្ស​ពូកែ​"​។​

"​នៅពេល​អ្នកមាន​អាយុ ៦០ ប្លាយ ត្រូវ​ចំណាយពេល​សម្រាប់​ខ្លួនឯង​។ ដេក​អាំង​ថ្ងៃ​នៅ​មាត់សមុទ្រ​ជាដើម ព្រោះ​វា​យឺត​ពេល​សម្រាប់​ឲ្យ​អ្នកធ្វើការ​ផ្លាស់ប្តូ​រហើយ​នៅ​អាយុ​ប៉ុណ្ណេះ​"​។

​លោក​ជែក ម៉ា​ក៏បាន​លាតត្រដាង​ដែរ​ថា វិប្បដិសារី​ធំ​បំផុត​របស់លោក​គឺ​ការ​ក្លាយជា​មហាសេដ្ឋី​ល្បីឈ្មោះ ព្រោះ​វា​បាន​ដណ្តើមយក​សិទ្ធិ​ឯកជន​របស់លោក​អស់រលីង អ៊ីចឹង​ហើយ​បានជា​លោក​ប្រាថ្នា​ឲ្យ​ខ្លួន​លោក​បាន​ចំណាយពេល​ច្រើន​ជាមួយ​គ្រួសារ​៕

 

Good Message from AliBaba PresidentMr Ma Yun

Posted by Sai Satish on Saturday, June 6, 2015

 

មតិយោបល់