1 copy

អ្នកមាន​ភ្នែក​មុត​! ពួក​មហាសេដ្ឋី​រួមទាំង​សេដ្ឋី​ហុងកុង លីកា​ស៊ី​ង មើលឃើញ​រ៉ែ​អ៊ុយ​រ៉ា​ញ៉ូ​ម​ឡើងថ្លៃ​នៅ​ប៉ុន្មាន​ឆ្នាំ​ទៀត​នេះ​

    ​ពួក​មហាសេដ្ឋី​ពាន់​លាន​ដុល្លារ​មើលឃើញថា ពួកគេ​នឹង​រឹតតែ​ក្លាយជា​អ្នកមាន​ពី​ឱកាស​វិនិយោគ​លើ​រ៉ែ​អ៊ុយ​រ៉ា​ញ៉ូ​ម ខណៈដែល​ពួកគេ​ព្យាករណ៍​ថា រ៉ែ​នេះ​នឹង​ឡើងថ្លៃ​ទ្វេដង​នៅត្រឹម​ឆ្នាំ ២០១៨​។ រ៉ែ​អ៊ុយ​រ៉ា​ញ៉ូ​ម​សព្វថ្ងៃ​កំពុងស្ថិត​ក្នុង​ដំណើរការ​រុករក​យ៉ាងសកម្ម​។ 

​    ​បច្ចុប្បន្ន​រ៉ែ​នេះ​ពិបាក​រក​ទីផ្សារ​ណាស់ ក៏ប៉ុន្តែ​ពួក​អ្នកវិនិយោគ​មើលឃើញថា​ប៉ុន្មាន​ឆ្នាំ​ខាងមុខ​វា​នឹងមាន​ទីផ្សារ ហើយ​តម្លៃនឹង​ឡើង​ទ្វេដង​។ 

​    ​លោក David Talbot អ្នកវិភាគ​រ៉ែ​អ៊ុយ​រ៉ានី​ញ៉ូ​ម​នៅ​ផ្សារ Dundee Capital Markets និយាយថា តម្រូវការ​រ៉ែ​នេះ​នឹង​កើនឡើង ៦ ភាគរយ​រាល់​ឆ្នាំ​រហូតដល់​ឆ្នាំ ២០២០ ដែល​ល្មម​ធ្វើឱ្យ​តម្លៃ​រ៉ែ​នេះ​ចាប់ផ្តើម​ឡើង​ចាប់ពី​ពេល​ឥឡូវនេះ​ទៅ​។ លោក David Wang អ្នកវិភាគ​នៅ​ក្រុមហ៊ុន Morningstar ព្យាករណ៍​ថា​តម្លៃ​រ៉ែ​នេះ​នឹង​ឡើង​ទ្វេដង​ត្រឹម​ឆ្នាំ ២០១៨​។ 

​     លោក Paul D. Gray ប្រធាន និង​នាយក​ប្រតិបត្តិ​ក្រុមហ៊ុន Zadar Ventures Ltd. បាន​ប្រាប់​វេ​ប​សាយ Oilprice.com ថា ថាមពលនុយក្លេអ៊ែ​រកំ​ពុង​និយម​ឡើងវិញ​ហើយ ព្រោះ​វា​ជា​ប្រភព​ថាមពល​ស្អាត​ជាង​ប្រភព​ថាមពល​ដទៃ សម្រាប់​មនុស្ស​ជំនាន់​ក្រោយ​។ 

​    ​លោក​បន្តថា ការប្រើប្រាស់​ថាមពលនុយក្លេអ៊ែរ​កំពុង​ចាប់ផ្តើម​ចាក់ឫស​គល់​ពី​ឥឡូវនេះ​ទៅហើយៗ​រ៉ែ​អ៊ុយ​រ៉ានី​ញ៉ូ​ម​នឹង​ក្លាយជា​ធាតុ​ដ៏​សំខាន់​សម្រាប់​រោងចក្រ​ថាមពលនុយក្លេអ៊ែរ​។​

​    ​កាលពីដើម​ខែមិថុនា​នេះ មហាសេដ្ឋី​វិនិយោគ​ហុងកុង លោក លី កាស៊ី​ង បាន​និយាយថា លោក​នឹង​ទិញ​មូលប័ត្រ​បំណុល ៦០ លាន​ដុល្លារ​ពី​ក្រុមហ៊ុន NexGen Energy ដែល​ផ្តោតលើ​គម្រោង​រ៉ែ​អ៊ុយ​រ៉ានី​ញ៉ូ​ម​ក្នុង​ខេត្ត Saskatchewan ប្រទេស​កាណាដា​។ 

​    ​លោក Leigh Curyer នាយក​ក្រុមហ៊ុន NexGen បាន​និយាយ​ទាក់ទិន​នឹង​កិច្ចព្រមព្រៀង​ជាមួយ​សេដ្ឋី​លីកា​ស៊ី​ង​ថា "​បច្ចុប្បន្ន​តម្លៃ​រ៉ែ​នេះ​នៅ​ទាប​ទេ ប៉ុន្តែ​តាម​ការព្យាករណ៍​ចង្អុល​បង្ហាញថា រ៉ែ​នេះ​នឹងមាន​តម្រូវការ​ខ្ពស់ ហើយ​ការផ្គត់ផ្គង់​នឹងខ្វះ​ខាត​។ ពេលនោះ​ហើយ​ដែល​អ្នកនឹង​ចាប់ផ្តើម​សម្រុក​រុករក​រ៉ែ​នេះ​"៕

ប្រភព៖ valuewalk

អ្នកនឹងចូលចិត្ត

មតិយោបល់