adverise with khmeread Untitled 1

ឃាតកររ​ហស្ស​នាម​" ជួប សម្លាប់ " កាន់​កាំភ្លើង​តាំងពី​ប្រទេស​ថៃ​មក​បាញ់​លោក​កែម​ឡី អ្នកវិភាគ​ឯករាជ្យ​ឱ្យស្លាប់​នៅក្នុង​ម៉ា​ត

    ​ភ្នំពេញ​៖ ផ្តើមចេញពី​មូលហេតុ​ខ្មាន់កាំភ្លើង​បានឱ្យ​ប្រាក់​ទៅ​លោក​កែម​ឡី​ចំនួន​៣​ពាន់​ដុល្លារ​ដើម្បី​រួមគ្នា​ជួយ​ប្រជាជន​តែ​គ្មាន​ឃើញ​សកម្មភាព ទើប​តាម​ទារលុយ​នោះមក​វិញ​រហូត​ខឹង​ខ្លាំង​ទិញ​កាំភ្លើង​ពី​ប្រទេស​ថៃ សំដៅ​មក​ភ្នំពេញ​បាញ់​លោក​កែម​ឡី​ចោល​តែម្តង ។ នេះ​ជាស​ម្តី​របស់​ឃាតក​សារភាព​ភ្លាមៗ​ប្រាប់​សមត្ថកិច្ច​ក្រោយ​ចាប់ខ្លួនបាន​។ 

        ​អំពើ​ឃាតកម្ម​បាញ់ប្រហារ​នេះ​បាន​កើតឡើង​នៅវេលា​ម៉ោង​ជិត​៨​និង​៤៥​នាទី​ព្រឹក​ថ្ងៃទី​១០ ខែកក្កដា ឆ្នាំ​២០១៦ ក្នុង​ហាង​ម៉ា​តនៃ​ស្ថានីយ៍​កាល់​តិច​បូកគោ ខណ្ឌចំការមន​។ សមត្ថកិច្ច​បានបញ្ជាក់​ថា ជនរងគ្រោះ​មានឈ្មោះ​កែម ឡី មុខរបរ​អ្នកវិភាគ​ឯករាជ្យ​នៅ​កម្ពុជា​។ រីឯ​ជនដៃដល់​ជា​ឃាតក មានឈ្មោះ​និង​រហស្ស​នាម "​ជួប សម្លាប់​"​។​

          ​សាក្សី​នៅ​កន្លែងកើតហេតុ​បាន​រៀបរាប់ថា ដូច​សព្វមួយដង ទីកន្លែង​កើតហេតុ​នេះ​លោក​កែម​ឡី ឧស្សាហ៍​មក​ផឹក​កាហ្វេ​នៅក្នុង​ម៉ា​ត​នេះ​។ លុះ​នៅ​ព្រឹក​ថ្ងៃកើតហេតុ​ខណៈ​លោក​កែម​ឡី​កំពុង​ទទួលទាន​កាហ្វេ ក៏​ស្រាប់តែ​លេចមុខ​បុរស​ម្នាក់​ដើរ​សំដៅ​ចូលមក និង​និយាយ​ស្រែក​ដាក់គ្នា​ខ្លាំងៗ រួច​ជនល្មើស​ដក​កាំភ្លើង​បាញ់​សំដៅ​ក្បាល​លោក​កែម​ឡី​ចំនួន​២​គ្រាប់​ដេក​ដួល​ក្នុង​ថ្លុកឈាម​តែម្តង​។ បន្ទាប់ពី​ធ្វើ​សកម្មភាព​រួច ជនល្មើស​បាន​ព្យាយាម​រត់ចេញ​ពី​កន្លែងកើតហេតុ​ដោយ​ថ្មើរជើង​ទាំង​សម្លៀកបំពាក់​ជាប់​ដោយ​ដាន​ឈាម​ជនរងគ្រោះ​ខ្ទាត​ចំ ប៉ុន្តែ​ត្រូវ​សមត្ថកិច្ច​ឃាត់ខ្លួន​បាន​ក្រោយ​កើតហេតុ​ប្រហែល​២០​នាទី​ប៉ុណ្ណោះ  ជាមួយនឹង​វត្ថុតាង​កាំភ្លើងខ្លី​ដែល​ធ្វើ​សកម្មភាព​។ 

​    ​ជនល្មើស​បាន​និយាយប្រាប់​សមត្ថកិច្ច​ថា លោក​កែម​ឡី​បាន​ជំពាក់​លុយ​ខ្លួន​ចំនួន​៣​ពាន់​ដុល្លារ​អស់​រយៈពេល​ជិត​១​ឆ្នាំ​ហើយ​តែ​ជនរងគ្រោះ​មិន​ព្រម​សង​។ 

​    ​ជនល្មើស​បានឱ្យដឹង​ទៀតថា នៅ​ឆ្នាំមុន​គឺ​ខ្លួន​បានឱ្យ​លុយ​៣​ពាន់​ដុល្លារ​ទៅ​ជនរងគ្រោះ ដើម្បី​រួមគ្នា​ជួយ​ប្រជាជន តែ​ខ្លួន​មិន​បានឃើញ​សកម្មភាព​អ្វី​ទាំងអស់ ទើប​តាម​ទារលុយ​នោះមក​វិញ​រហូត​ខឹង​ខ្លាំង​ទៅ​ទិញ​កាំភ្លើង​ពី​ប្រទេស​ថៃ សំដៅ​មក​ភ្នំពេញ​បាញ់ចោល​តែម្តង​។ (​សំឡេង​ដើម​ជនល្មើស​)​។ ទោះជា​យ៉ាងណា សមត្ថកិច្ច​បាន​ចាត់​បញ្ជូន​ជនល្មើស​បន្តទៅ​ស្នងការដ្ឋាន​នគរបាល​រាជធានី​ភ្នំពេញ​ដើម្បី​សួរចម្លើយ​បន្ត​។ 

​    ​ដោយឡែក​នៅ​កន្លែងកើតហេតុ សមត្ថកិច្ច​ជំនាញ​បានធ្វើការ​ត្រួតពិនិត្យ​និង​ធ្វើ​កោសល្យ​វិ​ច្ច័​យ​៕​

 

adverise with khmeread

មតិយោបល់